Қолайсыз ауа райына байланысты Қазақстанның бірнеше өңірінде республикалық маңызы бар тасжолда қозғалысқа уақытша шектеу енгізілді. Бұл туралы Baribar.kz хабарлап отыр.
«ҚазАвтоЖол» мәліметінше, Ұлытау облысында 17 сәуір сағат 07:30-дан бастап «Қызылорда – Жезқазған – Қарағанды – Шідерті» автожолының 433–788 шақырым аралығында (Жезқазған қаласынан Қарағанды облысының шекарасына дейін) барлық көлік түрлерінің қозғалысы тоқтатылды. Жолды сағат 11:30-да ашу жоспарланған.
Қарағанды облысында да дәл осы бағыттың 788–906 шақырым аралығында (Ұлытау облысының шекарасынан Топар кентіне дейін) қозғалысқа шектеу қойылды. Бұл учаске де 11:30-да ашылады деп күтілуде.
Абай облысында 17 сәуір сағат 09:00-ден бастап бірқатар негізгі трассалар жабылды. Атап айтқанда:
- «ҚХР шекарасы – Майқапшағай – Қалбатау – Семей – Павлодар – РФ шекарасы» жолының 756–906 шақырымы (Семей – Қалбатау);
- «Алматы – Талдықорған – Өскемен – Шемонаиха – РФ шекарасы» жолының 778–967 шақырымы (Аягөз – Қалбатау).
Жолды сағат 15:00-де ашу жоспарланып отыр.
Сонымен қатар 17 сәуір сағат 09:00-ден бастап Шығыс Қазақстан облысы мен Абай облысында жүк және қоғамдық көліктерге, сонымен бірге жазғы дөңгелекпен жүрген автокөліктерге бірқатар бағыттарда шектеу енгізілді.
ШҚО-дағы негізгі шектеулер:
- «Өскемен – Семей» (Казачье – Таврия; Таврия – Абай облысы шекарасы);
- «Өскемен – Риддер – РФ шекарасы» (Өскемен – Риддер);
- «Өскемен – Алтай – Катонқарағай – Рахман қайнары»;
- «Алматы – Талдықорған – Өскемен – Шемонаиха – РФ шекарасы» жолының бірнеше учаскесі.
Абай облысында:
- «Алматы – Талдықорған – Өскемен – Шемонаиха – РФ шекарасы» (Қалбатау – ШҚО шекарасы);
- «Өскемен – Семей» (ШҚО шекарасы – Семей).
Бұл бағыттардағы қозғалысты 17 сәуір күні сағат 14:00-де қайта ашу жоспарланып отыр.
