Қазақстанның ғылым және жоғары білім министрлігі ұлттық бірыңғай тестілеуді (ҰБТ) халықаралық тест деңгейіне жеткізуді жоспарлап отыр.
Бұл туралы министрліктің ресми өкілі айтты.
Ведомствоның мәліметінше, ҰБТ-ны жаңғырту кезең-кезеңімен жүргізіледі. 2026 жылы емтихан форматына ешқандай өзгеріс енгізілмейді. Бұл оқушылар мен ата-аналарға алдын ала дайындық жүргізуге жағдай жасау үшін жасалып отыр.
ҰБТ-ны халықаралық стандарттарға бейімдеу мәселесі Нью-Йоркте өткен Қасым-Жомарт Тоқаев пен Educational Testing Service (ETS) компаниясы басшылығы арасындағы кездесуде талқыланған.
Ғылым және жоғары білім министрі Саясат Нұрбектің айтуынша, ETS мамандары тест мазмұнын қайта қарап, сапалы сұрақтар дайындауға қатысады.
80 жылдық тарихы бар ETS – әлемдегі ең ірі тест жасайтын және тестологияны зерттейтін ғылыми орталық. Алдағы уақытта бұл ұйым біздің ҰБТ сапасын арттыруға атсалысады. Келесі айда ETS зерттеушілерінің делегациясы Қазақстанға келеді, – деді министр.
