Бақытжан Сағынтаев Мемлекеттік хатшы болып тағайындалды

Ол 2016 жылдың қыркүйегінен 2019 жылдың ақпанына дейін Үкіметті басқарды.

Бақытжан Сағынтаев
Бақытжан Сағынтаев ©Іnform.kz

Нұрсұлтан Назарбаев Бақытжан Сағынтаевты Мемлекеттік хатшы қылып тағайындады. Ақорданың сайтында Президенттің осы туралы жарлығы жарияланды.

Бақытжан Әбдірұлы Сағынтаев Қазақстан Республикасының Мемлекеттік хатшысы болып тағайындалсын, – делінген Мемлекет басшысының жарлығында.

Еске салайық, 21 ақпан күні Қазақстан Президенті Үкіметті отставкаға жіберген еді. Бақытжан Сағынтаев қызметінен босатылып, оның орнына Асқар Мамин Премьер-министр болып тағайындалды. Бақытжан Сағынтаев “Нұр Отан” партиясы саяси кеңесіне мүше болды.

Бұған дейін Мемлекеттік хатшы лауазымында Гүлшара Әбдіқалықова болған еді. Үкіметтің жаңа құрамы бекітілгеннен кейін ол Премьер-министрдің орынбасары болып тағайындалды.