Қазақстанда Талдау және болжамдау орталығы құрылды. Бұл туралы ҚР Президентінің ресми сайты хабарлады.
Мемлекет басшысының жарлығымен ҚР Президенті Әкімшілігінің құрылымына тиісті өзгеріс енгізіле отырып, Талдау және болжамдау орталығы құрылды, — делінген Президент жарлығында.
Ақорданың баспасөз қызметінің хабарлауынша, Мемлекет басшысының өкімімен Ержан Жалбақұлы Бабақұмаров Президент Әкімшілігінің Талдау және болжамдау орталығының меңгерушісі болып тағайындалды. Ол бұған дейін Премьер-министр кеңсесі басшысының орынбасары қызметін атқарған еді.
Бүгін сонымен бірге Президент өкімімен Мақсат Нұрдәулетұлы Мұханов ҚР Президенті Әкімшілігінің Әлеуметтік-экономикалық мониторинг бөлімінің меңгерушісі болып тағайындалды, ол Президент Әкімшілігінің Мемлекеттік бақылау және аумақтық-ұйымдастыру жұмысы бөлімінің меңгерушісі қызметінен босатылды.