Астанада дарынды қыз балаларға арналған «Білім-инновация» лицейіне ғимарат берілді. Білім мекемесі 15 жылдан бері жеке ғимаратсыз қызмет етіп келген.
Астана әкімдігінің мәліметінше, «Білім-инновация» лицейінің оқушылары қалалық, республикалық, халықаралық пән олимпиадаларында жүлделі орындарды иеленіп келеді. Лицейге оқуға түсу конкурсының талабы жоғары. Бір орынға 20 адамнан келеді.
Елорда басшысы Әсет Исекешев 188-көшеде жақында ғана бой көтерген мектепті дарынды қыздарға арналған «Білім-инновация» лицейіне беруді ұйғарды. Алдағы уақытта лицей 5-сыныптан бастап оқыту үшін балаларды көп қабылдамақ. Жаңа ғимарат дер кезінде беріліп отыр.
Әсет Исекешев өзінің орынбасары Қосман Аймұхаметовке мектепті кірме жолмен қамтамасыз етуді, 188-көшеде жол құрылысын жеделдетуді тапсырды. Мектеп ауласы 25 тамызға дейін абаттандырылып бітуі керек.
