Қазақстанның мемлекеттік шекарасында бір апта ішінде декларацияланбаған валютаны заңсыз алып өтпек болған 38 әрекет анықталды. Бұл туралы Baribar.kz хабарлап отыр.
Ұлттық қауіпсіздік комитетінің шекара қызметінің мәліметінше, 30 маусым мен 7 шілде аралығында мемлекеттік шекарадағы өткізу пункттерінде жүргізілген бақылау барысында жалпы сомасы 636 миллион теңгеден астам декларацияланбаған қолма-қол валюта анықталған.
Ірі заңбұзушылықтардың бірі Жамбыл облысындағы «Қордай» автокөліктік шекаралық бақылау бөлімінде тіркелді. Шетел азаматының жүгін тексеру кезінде 350 мың АҚШ доллары, яғни шамамен 170 млн теңге табылған, — делінген хабарламада.
ҰҚК мәліметінше, аталған факті бойынша материалдар процессуалдық шешім қабылдау үшін құзырлы органдарға жолданған.
Шекара қызметі Қазақстан заңнамасына сәйкес республика аумағынан 10 мың АҚШ долларының баламасынан асатын қолма-қол ақшаны алып шығуға тыйым салынатынын тағы да еске салды.
