Не болды?
Президент жаңа Конституцияның қабылдануына байланысты рақымшылық жасау туралы заңға қол қойды. Бұл туралы Baribar.kz хабарлап отыр.
Мәлімет
Мемлекет басшысы қол қойған құжаттың қатарында «Қазақстан Республикасының жаңа Конституциясының қабылдануына байланысты рақымшылық жасау туралы» заң бар.
Сонымен қатар президент атқарушылық іс жүргізу, сот орындаушының мәртебесі және заңсыздықты болдырмау бойынша кей заңнама актісіне өзгеріс пен толықтыру енгізуге қол қойды.
Бұдан бөлек, қылмыстық кодекске, қылмыстық-процестік кодекске және әкімшілік құқық бұзушылық туралы кодекске өзгеріс пен толықтыру енгізу туралы заңға да қол қойды.
Рақымшылыққа кімдер ілінеді?
Жаңа Конституцияның қабылдануына байланысты қылмыстық теріс қылық пен ауыр емес қылмыс жасаған азаматтар қылмыстық жауапкершіліктен немесе негізгі жазадан босатылады.
Сонымен қатар рақымшылыққа мына санаттағы адамдар ілігеді:
- орташа ауыр қылмыс жасағандардың өтелмеген жаза мерзімі екі есе қысқарады;
- ауыр қылмыс жасап, залалды толық өтегендердің жаза мерзімі үштен біріне қысқарады;
- аса ауыр қылмыс жасап, залалды толық өтегендердің жаза мерзімі төрттен біріне қысқарады;
- ауыр қылмыс жасап, залалды өтемегендердің жаза мерзімі төрттен біріне қысқарады;
- аса ауыр қылмыс жасап, залалды өтемегендердің жаза мерзімі бестен біріне қысқарады;
- теріс мінез-құлқы жоқ және рақымшылыққа ілінген кезде жазасының аяқталуына бір жылдан аспайтын мерзім қалған сотталғандар жазаның қалған бөлігін толық өтеуден босайды.
Кімдер рақымшылыққа ілінбейді?
Рақымшылық төмендегі санаттағы адамдарға жүрмейді:
- терроризм қылмысын жасағандар;
- экстремизм қылмысын жасағандар;
- сыбайлас жемқорлық үшін сотталғандар;
- ұйымдасқан қылмыстық топтың мүшелері;
- азаптау қылмысын жасағандар;
- кәмелетке толмағандардың жыныстық құқығын таптап, қылмыс жасағандар;
- қылмысты қайталап (рецидив) жасағандар;
- өмір бойына бас бостандығынан айырылғандар;
- сырттай сотталған адамдар.
Контекст
Естеріңізге салайық, бұл жолғы рақымшылықтың басты ерекшелігі – Қазақстан тарихында алғаш рет қылмыстық рақымшылықпен қатар әкімшілік рақымшылықтың да қатар жүзеге асырылуы.
