Алматыда заңсыз жұмыс істеуге келетін шетел азаматы көбейген. Бұл туралы Алматы қаласының полиция департаменті хабарлап отыр.
Полиция мәліметінше, жыл басынан бері Алматыда 14 712 шетел азаматы Қазақстан Республикасының көші-қон заңнамасын бұзғандары үшін әкімшілік жауапкершілікке тартылған. Ал 1 737 шетелдік құқықбұзушы соттың шешімімен елден депортацияланған.
Алматыға заңсыз жұмыс істеуге көбінесе көршілес Қырғызстан, Өзбекстан, Тәжікстан, сонымен қатар Африка кұрлығы елдерінің азаматтары келеді. Олар кұрылыс, қызмет көрсету, сауда-саттық, тамақтандыру салаларында жұмыс істейді, — делінген хабарламада.
Алматы қаласы жұмыспен қамту және әлеуметтік бағдарламалар басқармасының мәліметіне сәйкес, өткен жылы Алматыда заңды тұлғаларға шетелден жұмыс күшін тартуға 1 242 квота бөлінсе, биыл 832 бірлік рұқсат берілген.
