Театр әл-Фараби мен Назарбаев даңғылдарының қиылысында орналасқан. Мультифункционал мәдени орталықтың жалпы ауданы — 14 000 шаршы метр. Ғимарат төрт қабаттан тұрады.
Театр өзге мәдениет ғимараттарынан ішкі және сыртқы сән-салтанатымен ерекшеленеді. Оның айналысындағы саябақ, жарығы бар фонтан демалуға, серуендеуге және фотоға түсуге таптырмас локация бола алады.
Тағы бір ерекшелігі — театрда қала тұрғындары мен қонақтары үшін интерьері ерекше мейрамханалар мен кофеханалар бар.
Almaty theatre-дың бірінші қабатында мәдениет, өнер туралы дәрістер мен семинарлар өтеді.
Театрдың екінші қабаты — түрлі көрме мен арт-перфоманс жасауға ең лайық жер.
Almaty theatre-да хореография мектебі де болады. Мұнда балеттің болашақ артистері ғана емес, билеп көргісі келетіндердің бәрі келе алады. Осылайша, театр мен мектеп ұжымы Алматының балеттегі жаңа кезеңі басталатынына сенімді.
Балет класының терезесінен Алматының оңтүстігіндегі биік әрі әдемі ғимараттарды көруге болады.
700 орындық көрермен залы және үлкен сахнасы бар театр тек опера мен балетке арналмаған. Мұнда өнердің кез келген түрінен шара өте береді.
Қазақстан хореографтар одағы төрағасының бірінші орынбасары және гастрольдерді ұйымдастырушы Нұрлан Қонақбаев театрдың техникалық мүмкіндіктерін жоғары бағалады.
Оның айтуына қарағанда, дүниежүзінің балет жұлдыздары сахнаның, жарықтың, акустиканың және театрдың жалпы техникалық мүмкіндіктерінің өте жоғары болуын талап етеді. Сахнада дәл қазір тұрған еден арлекин деп аталады, балет үшін арнайы қойылған. Бұл аяқтың тайып кетпеуіне, еркін қимылдауға көмектеседі және ең бастысы — артистердің буынына түсетін күшті азайтады. Ал еденді басқа шаралар өтетін кезде жинап алуға болады.
Almaty theatre сахнасында алғаш болып қазақстандық бренд — «Астана балет» өнер көрсетті. Театрдың Алматыдағы гастролі 28 мамырға дейін жоспарланған.
Ресейдің Борис Эйфман театрының 60 артистен тұратын труппасы да Almaty theatre-да алғашқылардың бірі болып өнер көрсетеді. Олар 7 мамырда алматылықтар үшін «Анна Каренинаны» қойса, 8-9 мамыр күндері «Роденді» сахналайды.
