Орыс

ҚР ҰЭМ Статистика комитетінің мәліметінше, Қазақстандағы орыстардың саны – 3,5 миллион. Олар бүкіл халықтың 19%-ына тең. Орыс халқының ұлттық тағамы қазақстандықтардың күнделікті рационындағы асына айналып кеткен. Мысалы, щи сорпасы, тұшпара, ботқа, бәліш, құймақ, тұзды қияр, оливье, винегрет салаттары, тосап, квас және тағы басқа. Қазақстанның кез келген асханасынан бұл тағамдардың дәмін татуға болады. Славян халқы құймақты Масленица мерекесіне арнайы дайындайды, ал қуырылған жұмыртқаны Әулие Троица (Пасхадан кейінгі 50-күн) күнінде пісіреді.

орыс
Фото: Айгүл Хожантаева/Baribar.kz

Өзбек

Қазақстандықтардың 3%-ы – өзбектер. Жалпы саны – 600 мыңға жуық. Өзбектердің көпшілікке танымал ұлттық тағамдарының бірі – палау. Оның дайындалу әдісі әр жерде әртүрлі. Әдеттегі палауды майға пиязды қыздырып, мал етін (көбіне қой етін), сәбіз қосып, күріш салып, бұқтырып дайындайды. Оған кейде өрік немесе мейіз де қосылады. Ет қосылмай, мейіз салып пісірген түрін тәтті палау деп те атайды. Сонымен бірге бұл халықтың тандыр наны да қазақстандықтарға таңсық тағам емес.

өзбек диаспорасы
Фото: Айгүл Хожантаева/Baribar.kz

Украин

Қазақстанда 270 мыңнан астам украин бар. Олар – барлық халықтың 1,4%-ы. Қазақстанның кез келген асханасынан көріп жүрген борщ, вареники, голубцы сияқты тағамдардың украиндардың ұлттық асы екенін білесіз бе? Сонымен бірге холодник, капустняк және юшка сорпасы  да – украиндардың басты ұлттық тағамы. Украин мен орыс дастарханы ұқсас.

украин
Фото: Айгүл Хожантаева/Baribar.kz

Неміс

Елімізде 178 мыңнан астам неміс тұрады. Немістің ұлттық тағамдарының басым көпшілігі еттен тұрады. Неміс дастарханында қуырылған шұжық пен шошқа еті көп болады. Немістердің негізгі тағамдарының бірі – швайнбратен немесе шошқа еті. Шұжық та олардың сүйікті тағамдарының қатарына жатады. Оны Германияның әр жерінде әртүрлі соуспен ұсынады.

Неміс диаспорасы
Фото: Айгүл Хожантаева/Baribar.kz

Түрік

Қазақстанда 112 мыңнан астам түрік өмір сүріп жатыр. Бұл халықтың долма, дөнер-кебаб, лахмаджун, пита сияқты тағамы елімізде аса танымал. Сонымен бірге түрік асханасы десерт түріне өте бай. Солардың бірі – шекерпаре. Ол “шекерлі тәтті бөлік” деген мағынаны білдіреді. Шекерпаренің ортасына шекер сиропы құйылып, жаңғақ қосылады.

Түрік
Фото: Айгүл Хожантаева/Baribar.kz

Әзірбайжан

Қазақстандағы әзірбайжан халқының саны 110 мыңнан асады. Олардың ұлттық тағамдарының ішінде ең танымалы – әзірбайжан палауы. Оның басқа палаудан айырмашылығы – әр қоспасы бөлек пісіріліп, дастарханға қояр алдында ғана біріктіреді. Бұл халықтың танымал тағамдарының көбі еттен жасалады. Мысалы, долма, люля-кебаб, басдырма, пити және бозбаш.

Әзірбайжан
Фото: Айгүл Хожантаева/Baribar.kz

Шекербура – әзірбайжанның жаңғақ қосылған, ұннан жасалған тағамы. Ол қазақша “тәтті бәліш” дегенді білдіреді. Әзірбайжан халқы бұл тағамды көбіне Наурыз мерекесінде пісіреді. Шекербураға бидай секілді өрнек салынады. Оған отбасы мүшелерінің есімін жазу да сәнге айналған.

әзірбайжан
Шекербура. Фото: Айгүл Хожантаева/Baribar.kz

Дүнген

Қазақстанда 72 мыңнан астам дүнген тұрады. Олардың кей тағамдары қазақ халқының тағамдарына ұқсас. Дүнген халқы да қазақтар секілді көп тағамды еттен жасайды, оны құнарлы деп есептейді. Бұл халықтың ұлттық тағамы – лағман. Қазір бұл тағамды қырғыз, өзбек, қазақ асханасынан жиі байқауға болады. Дүнгендер кез келген тағам түріне бұрыш, сарымсақ пен сіркесу қышқылын жиі қосады.

дүнген
Фото: Айгүл Хожантаева/Baribar.kz

Елімізде тату-тәтті өмір сүріп жатқан түрлі ұлттың тағамдары жуырда Алматыда Қазақстан халқының бірлігі күніне арналған “Достық дастарханы” атты фестивальде көрмеге қойылды.

“Достық дастарханы” фестивалі әртүрлі этностың ұлттық тағамдарымен танысу арқылы толеранттық пен мәдениетаралық түсіністікті нығайтуды көздейді. Бұл жоба тіл-діні бөлек халықтарды бір істің аясында біріктіруге және мәдениеттер ерекшелігін ашуға септігін тигізеді.

Фестивальге Қазақстан халқы ассамблеясы төрағасының орынбасары – ассамблея хатшылығының меңгерушісі Жансейіт Түймебаев та куә болды.

Біздің Telegram-каналымызға жазылыңыз!