Не болды?
Алматыда демалыс күндері ауылшаруашылық өнімдерінің арнайы жәрмеңкесі өтіп, шамамен 700 тонна азық-түлік сатылады. Бұл туралы Алматы қаласы әкімдігінің баспасөз қызметі хабарлап отыр.
Мәлімет
«Алматы» әлеуметтік-кәсіпкерлік корпорациясы ұйымдастырып отырған жәрмеңкеде: 340 тоннадан астам ет және ет өнімдері, шамамен 280 тонна көкөніс пен жеміс-жидек, 40 тоннадан астам сүт өнімдері және 40 тоннаға жуық азық-түлік пен тұздалған тағамдар сатылады.
Жыл басынан бері жәрмеңке қалада 316 рет өтті, онда 330-дан астам фермер 1 000-нан астам өнім түрін ұсынды. Азық-түлік тауар өндірушілерден және қайта өңдеуші кәсіпорындардан делдалсыз жеткізіледі, яғни тауарды нарық бағасынан төмен деңгейде саудалауға мүмкіндік береді.
Жәрмеңке әр сенбі және жексенбі күндері сағат 09:00-ден 18:00-ге дейін өтеді. Өтетін орындары:
- Алмалы ауданы — Масанчи көшесі, Гоголь және Әйтеке би көшелерінің арасы;
- Бостандық ауданы — «Қазақфильм» шағынауданы, Исиналиев көшесі;
- Әуезов ауданы — Өтеген батыр көшесі, Абай даңғылынан төмен;
- Медеу ауданы — Меңдіқұлов бульвары, Бектұров көшесінің қиылысы;
- Жетісу ауданы — «Құлагер» шағынауданы, Серіков көшесі, 2.
Апта сайын жәрмеңкеге 30 мыңнан астам адам келеді. Демалыс күнгі жәрмеңкеден бөлек, жаңа егін өнімдері қаладағы сауда желілерінің сөрелерінде де қолжетімді бағамен ұсынылып отыр.
