Әл-Фараби атындағы ҚазҰУ ғылыми мақалалар саны бойынша Қазақстанның ғылыми-зерттеу ұйымдары мен жоғары оқу орындарының арасында бірінші орын иеленді. Бұл туралы ҚазҰУ-дың баспасөз қызметі хабарлады.
Ұлттық университет Web of Science халықаралық дерекқорында рейтингтік журналдарда жарияланған мақалалар саны бойынша алда келеді.
Clarivate Analytics халықаралық компаниясы ҚазҰУ-ды «Web of Science Core Collection басылымдарындағы көшбасшы» номинациясымен марапаттады. Марапат ҚазҰУ-дың жетекші университет ретінде ғылым, білім және инновацияның алдыңғы қатарлы орталығы болып, халықаралық рейтингтік журналдарда ғалымдардың ғылыми-зерттеу жұмыстарының жоғары деңгейін көрсеткені үшін берілді.
ҚазҰУ ғалымдарынан дәйексөз келтірілген басылымдар саны жыл сайын 40%-ға өседі. Ғалымдардың айтуынша, бұл факт ҚазҰУ-дың әлемдік деңгейдегі зерттеу университетіне айналуына толық негіз бола алады.
Айта кетейік, Жоғары білім алудың қолжетімділігі мен сапасын арттыру — «Президенттің бес әлеуметтік бастамасының бірі». Сонымен бірге Қазақстанның жоғары білім беру саласын дамыту туралы Нұрсұлтан Назарбаевтың «Болашаққа бағдар: рухани жаңғыру» атты мақаласында да жазылған еді.
Табысты болудың ең іргелі, басты факторы білім екенін әркім терең түсінуі керек. Жастарымыз басымдық беретін межелердің қатарында білім әрдайым бірінші орында тұруы шарт. Себебі, құндылықтар жүйесінде білімді бәрінен биік қоятын ұлт қана табысқа жетеді, — делінген Нұрсұлтан Назарбаевтың мақаласында.
Web of Science Core Collection — әлемдегі ғылыми басылымдардың жетекші дерекқоры. Онда 18 мыңнан астам журнал индекстеледі, олардың 12 мыңнан астамының импакт-факторы бар.