ҚР Мемлекеттік хатшысы Гүлшара Әбдіқалықова жұмыс сапарымен Өзбекстан Республикасына барды. Сапар аясында Өзбекстан Республикасы Премьер-министрінің орынбасары, Әйелдер комитетінің төрайымы Тәнзила Нарбаеваның шақыруымен Қазақстан және Өзбекстан әйелдері бизнес-форумына қатысты.
Ақорданың баспасөз қызметінің хабарлауынша, жиынға Қазақстан Президенті жанындағы Әйелдер істері және отбасылық-демографиялық саясат жөніндегі ұлттық комиссия мүшелері, Парламент депутаттары, мемлекеттік органдардың, «Атамекен» Ұлттық кәсіпкерлер палатасының, үкіметтік емес ұйымдардың, кәсіпкер әйелдер қоғамдастығының өкілдері де қатысты.
Гүлшара Әбдіқалықова құттықтау сөзінде Елбасы Нұрсұлтан Назарбаевтың Қазақстан мен Өзбекстан арасындағы екіжақты қарым-қатынастың дамуына айрықша көңіл бөлетінін атап өтті.
Мемлекеттік хатшы Қазақстан Президентінің: «Біздің екі халықтың қарым-қатынасының шынайы бауырластық сипаты өз тамырын ғасырлар қойнауынан тартып, ата-бабаларымыздың ортақ тарихы мен бай рухани мұрасы арқылы беки түседі» деген сөзіне назар аударды.
Гүлшара Әбдіқалықова Қазақстанда әйелдердің экономикалық мүмкіндіктерін кеңейтуге бағытталған мемлекеттік саясат жүргізіліп отырғанын айтты.
Демократиялық қоғам құрудың негізгі бағыттарының бірі – гендерлік тепе-теңдікті қамтамасыз ету. Тәуелсіздік жылдарында қомақты нәтижелерге қол жеткіздік. Бізде әйелдердің саясатқа араласуы жөнінен орнықты ілгерілеушілік бар. Мәжілістегі депутаттардың 29-ы — әйел, бұл – депутаттар санының 27%-ынан астам көрсеткіш. Экономикада әйелдер кәсіпкерлігінің қарқынды секторы қалыптасты. Шағын және орта бизнес субъектілерінің 44%-ын әйелдер басқарады, олар бұл саладағы барлық жұмыс орнының үштен бірін қамтамасыз етіп отыр, – деді Мемлекеттік хатшы.
Форумда Қазақстан Президенті жанындағы Әйелдер істері және отбасылық-демографиялық саясат жөніндегі ұлттық комиссия мен Өзбекстан әйелдері комитеті арасында ынтымақтастық туралы меморандумға қол қойылып, Қазақстан мен Өзбекстанның кәсіпкер әйелдерінің инновациялық бизнес-жобалары таныстырылды. Тараптар озық тәжірибелерін ортаға салды.
Гүлшара Әбдіқалықова форум аясында Өзбекстан Республикасы Премьер-Министрінің орынбасары, Әйелдер комитетінің төрайымы Тәнзила Нарбаевамен бірге әйелдер бизнес қоғамдастықтары ынтымақтастығының, сонымен бірге әйелдердің рөлін арттыру және олардың мүмкіндіктерін кеңейтудің өзекті мәселелерін талқылады.