Алматыда Халықаралық балаларды қорғау күніне орай барлық медициналық мекемеде ашық есік күндері өтеді. Бұл туралы Baribar.kz хабарлап отыр.
Алматының қоғамдық денсаулық сақтау басқармасының мәліметінше, іс-шара аясында балалар мен жасөспірімдерге денсаулықты нығайту, салауатты өмір салтын насихаттау және түрлі аурулардың алдын алу бағытында тегін медициналық тексерулер мен кеңестер беріледі.
Бүлдіршіндер мен олардың ата-аналарына педиатр, стоматолог, травматолог, инфекционист, невропатолог, ЛОР дәрігері, акушер-гинеколог және басқа да салалық мамандар тегін консультация өткізеді. Сонымен қатар іс-шараларға жетекші сарапшылар, ғылыми қызметкерлер мен штаттан тыс бас мамандар қатысады. Қаладағы медициналық ұйымдарда ата-аналар мен жасөспірімдерге арналған пікір алмасу алаңдары, ақпараттық-түсіндіру жұмыстары, сурет байқаулары және мәдени-көпшілік бағдарламалар ұйымдастырылады. Ерекше қажеттігі бар балалар мен диспансерлік есепте тұрған балаларға ерекше көңіл бөлінеді. Олар үшін үй жағдайында көшпелі медициналық тексерулер де жүргізіледі, — делінген хабарламада.
Мамандардың айтуынша, іс-шараның басты мақсаты – балалар мен жастар арасында физикалық, психикалық және репродуктивтік денсаулық мәдениетін қалыптастыру.
Ашық есік күндерінің толық бағдарламасын тұрғындар медициналық ұйымдардың ресми сайттары мен әлеуметтік желідегі парақшаларынан біле алады.
