«ҚазАвтоЖол» ұлттық компаниясы ел аумағындағы бірқатар тасжолдың қазіргі жағдайы туралы ақпарат таратты.
Компания мәліметінше, 2025 жылғы 22 қараша сағат 00:30-да Павлодар облысында көлік айрығы қондырмасының шеткі арқалықтары зақымданған. Соған байланысты «Астана — Шідерті — Павлодар — Успенка — РФ шекарасы» автожолының Қалқаман ауылы бағыты мен Астанаға шығатын тұсында барлық көлік түріне уақытша шектеу енгізілді.
Айналма жол ретінде:
-
Қалқаманнан Астанаға қозғалыс – Береке «Қалқаман — Ақсу» көлік айрығы арқылы (ұзындығы 6 шақырым);
-
Павлодардан Қалқаманға қозғалыс – «Баянауыл» көлік айрығы арқылы жүзеге асырылады.
Ал Қалқаманнан Павлодарға және Астанадан Қалқаманға бағытталған жол бөліктері ашық.
Солтүстік Қазақстан облысында да жол қозғалысы шектелді. Мұнда жүргізіліп жатқан жөндеу-қалпына келтіру жұмыстарына толассыз жауын-шашын және ауыр жүк көліктерінің көп жүруі себеп болған. Соның салдарынан KZ15-08 «Тимирязево — Сарыкөл — облыс шекарасы» автожолының 0–30-шақырымында (Қостанай облысы шекарасы — Тимирязево ауылы) жол бір бөлігі опырылып түскен.
