Қазақстандық блогерлер кірістерін төмендеткендіктен 53,3 миллиард теңге көлеміндегі сәйкессіздіктер анықталды.
Бұл туралы мемлекеттік кірістер комитеті хабарлап отыр.
Мемлекеттік кірістер комитетінің мәліметінше, салықтық есептілігінде айтарлықтай сәйкессіздіктер анықталған. Нақтырақ айтсақ, 594 адам кірістің жалпы қаражатын 53,3 миллиард теңгеге төмендеткен.
Бақылау шараларын жүргізу барысында мемлекеттік кірістер органдары түрлі дереккөздерден алынған мәліметтерді салық декларацияларындағы ақпаратпен салыстыру нәтижесінде 594 адамға қатысты 53,3 миллиард теңге көлемінде сәйкессіздік анықталды. Осыған байланысты, 13-14 ақпан аралығында «кірісті төмендету» заңбұзушылығы бойынша хабарламалар жіберілді, — делінген хабарламада.
Комитеттің мәліметінше, блогерлер бұл хабарламаны орындау үшін қосымша салықтық есептілік тапсырып, салықты дербес есептеп төлейді. Егер салық төлеуші келіспесе, түсіндірме ұсынуға тиіс. Осының барлығы 30 күннің ішінде орындауы қажет.
