Түркістан облысы ПД ұйымдасқан қылмысқа қарсы күрес басқармасының қызметкерлері “Құқықтық тәртіп” жедел-профилактикалық іс-шарасы аясында қару-жарақ пен оқ-дәрілерді заңсыз сақтау фактісін анықтады.
Бұл туралы Түркістан облысының полиция депараменті хабарлады.
Полиция қызметкерлері Мақтаарал ауданы Атакент ауылында жедел-іздестіру іс-шараларын жүргізіп, күмәнді ВАЗ-2114 автокөлігін тоқтатты. Жедел уәкілдер көліктің ішін тексеру кезінде «Сайга» атыс қаруы мен шолақ аңшылық мылтық, сонымен қатар аталған қарулардың сегіз оқ-дәрісін тауып, тәркіледі. Жергілікті тұрғын полиция бөліміне жеткізілді, — делінген хабарламада.
Қазіргі уақытта сараптама тағайындалды. Күдікті қамауға алынды. ҚР ҚК-нің 287-бабы бойынша сотқа дейінгі тергеу амалдары басталды. Полицейлер ер адамның атыс қаруын қандай мақсатта заңсыз ұстағанын анықтап жатыр.
