Қаржылық мониторинг агенттігінің Павлодар облысындағы департаменті Ресейдің бидайын Қазақстан өнімі ретінде экспорттаған азаматты анықтады. Бұл туралы агенттігінің баспасөз қызметі хабарлады.
Анықталған азамат 2021-2022 жылдар аралығында 26 мың тонна ресейлік бидайды Орталық Азия елдеріне (Ауғанстан, Тәжікстан, Өзбекстан) қазақстандық өнім деп жазылған жалған шот-фактуралар бойынша 1 млрд теңгеден астам сомаға экспорттаған, — делінген хабарламада.
Осылай, жалпы сомасы 460 млн теңге болатын халықаралық транзиттік тариф бойынша тасымалдау төлемдерін төлеуден жалтарған.
Сотқа дейінгі тергеу аяқталды. ҚР ҚПК 201-бабының талаптары бойынша, тергеу мүддесіндегі өзге де мәліметтер жария етілмейді.
Агенттіктің мәліметінше, кейінгі бір жарым жылда Павлодар облысында 5,4 млрд теңгеден астам сомаға жалған шот-фактура бергені үшін бес тұлға қылмыстық жауапкершілікке тартылды.