Үкімет Ақтөбе және Батыс Қазақстан облыстарын дамытудың 2022-2025 жылдарға арналған жаңа кешенді жоспарларын әзірледі. Сонымен қатар қолданыстағы Атырау және Маңғыстау облыстарын дамытудың 2022-2025 жылдарға арналған кешенді жоспарлары қаралды.
Батыс өңірлерді дамытудың 4 кешенді жоспарын қаржыландырудың жалпы көлемі 15,3 триллион теңге, оның ішінде республикалық бюджеттен – 1,7 триллион теңге, — деді Әлібек Қуантыров Үкімет отырысында.
Премьер-министр Әлихан Смайылов батыс облыстарды әлеуметтік-экономикалық жағынан әрі қарай дамыту және халықтың әл-ауқатын жақсарту өте өзекті мәселе екенін атап өтті.
Кешенді жоспарлар экономиканың жекелеген салаларын дамытуға ғана емес, сапалы сумен қамтамасыз ету, білім беру мен денсаулық сақтаудың қолжетімді болуы, жаңа жұмыс орындарын құру сияқты маңызды мәселелерді шешеуге бағытталуы тиіс.
Ақтөбе облысында өнеркәсіп көлемін 2025 жылға қарай 2,8 триллион теңгеге дейін арттыру және қосымша 39 мыңнан астам жұмыс орнын құру жоспарланып отыр. Батыс Қазақстан облысында 2 мың шақырымнан астам электр желісі жаңғыртылады. Бұл желілердің тозуын айтарлықтай азайтады. 38 мыңнан аса жаңа жұмыс орны ашылады. Шамамен 2,1 триллион теңге жеке инвестиция тарту жоспарланып отыр.
Атырау облысында электр желілерінде жиілеп кеткен апатты болдырмау үшін тиісті шаралар қабылданады. 40 мыңнан астам жаңа жұмыс орны құрылады. Шамамен 8,3 триллион теңге жеке инвестиция тартылмақ. Маңғыстау облысында су тапшылығын ескеріп, су тұщытатын 9 зауыт пен қондырғыны салу және кеңейту көзделіп жатыр. Сонымен қатар 55 мыңнан астам жұмыс орны ашылады.
Әлихан Смайыловтың айтуынша, жобаларға негізінен бюджеттен тыс қаражатты тартуға басымдық беріліп отыр.
Үкімет құжаттарды мақұлдады. Премьер-министр құзырлы органдарға кешенді жоспарлардағы іс-шараларды уақытында және сапалы іске асыруды тапсырды.