Кейкі батырдың кескіні анықталды

Венгр антропологы Андраш Жолт Биро Кейкі батырдың бассүйегін қалпына келтіру жұмыстарын аяқтады, - деп хабарлайды Kazmuseum.kz тілшісі.

Белгілі тарихшы Берік Әбдіғалиұлы Facebook әлеуметтік желісіндегі парақшасында Кейкі батырдың бассүйегінің қалыпқа келтірілген эскизін жариялады. Жоспар бойынша Кейкі батырдың бассүйегін қалпына келтіру жұмыстарын аяқтау желтоқсан айына белгіленген болатын. Айта кетейік, биыл 12 тамызда Қазақстанның бұрынғы премьер-министрі Кәрім Мәсімов РФ Үкімет төрағасы Дмитрий Медведевпен кездесуі барысында өткен жүз жылдықтағы ұлт-азаттық қозғалыстың көшбасшысы Кейкі батырдың мүрдесін елге қайтару туралы мәселені көтерген еді. Нәтижесінде 6 қазан күні батырдың бассүйегі Астанаға жеткізілген болатын.

Кейкі батыр

Ал кейінірек Орталық мемлекеттік музейдің директоры Нұрсан Әлімбай 12 қазан күні Кейкі батырдың бассүйегі антропологиялық сараптама үшін Венгрияға жеткізілетінін мәлімдеді. Музей басшысы құнды жәдігерді арнайы контейнерде алып барды.