Татулық пен бірлікті нығайту мақсатында өткізілген шараны «Қоғамдық келісім» КММ директорының міндетін атқарушы Азамат Мукеев ашты.
Тәуелсіздікпен бірге шаңырақ көтерген орталық осы жылдар ішінде еліміздің өсіп-өркендеуіне үлесін қосып келеді. Олардың белсенділері үнемі бас қосып, мәдени салт-дәстүрді жаңғыртуға атсалысып, бабадан қалған бай мұраларын сақтап қалуға барын салуда. Бастысы — олар бірлік пен бейбіт күндердің қадірін терең ұғынған. Сондықтан да өңірдегі ынтымақтың ұйытқысы болған облыстық Қазақстан халқы ассамблеясына олардың алғысы шексіз. Пандемия кезеңінде де бірлестіктің мүшелері онлайн режимге көшіп, барлық шараға, мереке, байқауларға қатысып, белсенділік танытты, – деді ол.
Азамат Мукеев шара кезінде бірлестіктің мүшелеріне достық пен татулықты берік ету жолында атқарған жұмысы үшін Қазақстан халқы ассамблеясының 25 жылдық медалін табыстады.
Біздің күнделікті жұмысымыздың басты мазмұны қоғамдағы достық пен келісімді нығайту, жалпы рухани адамгершілік құндылықтарды насихаттау, өскелең ұрпақты патриотизм рухында тәрбиелей отырып, ортақ үйіміздің болашағы үшін жоғары жауапкершілікте болу, – деді Татар этномәдени бірлестігінің жетекшісі Галия Гизатуллина.
Сонымен қатар Қызылорда облысының дамуына үлесін қосқан татар этносының мүшелеріне облыстық Қазақстан халқы Ассамблеясы хатшылығының меңгерушісі Жағыпар Тажмахановтың Алғыс хатын табыстады.
Мәдени күн аясында тыл ардагерлеріне Татарстан Республикасының Президенті Рустам Миннихановтың құттықтау хаттары да табыс етілді.
Шарада әртүрлі жанрларда ән, би, өлеңдер орындалды. «Жасмин» би тобының өнерпаздары әскердегі күндерді еске түсіретін «Көк орамал» биін орындады. «Сарман» вокал тобы мен солистер түрлі тілде өлеңдер оқып, ұлы ақын Абай Құнанбаевтың әндерін шырқады.
