Қызылорда облысында эпидахуал күрделенсе, қосымша 3 зертхана іске қосылуға дайын

Бүгінгі таңда Қызылорда облысы бойынша COVID-19  коронавирус инфекциясын  ПТР әдісімен анықтау 4 зертханада жүзеге асырылады. Олар "Ұлттық сараптама орталығының" Қызылорда облыстық филиалы, облыстық фтизиопульмонология орталығының бактериологиялық зертханасы және мемлекеттік тапсырыс бойынша келісім шарт арқылы "Олимп" пен Invivo жеке клиникаларында жүргізіледі.

Коронавирус инфекциясы бойынша эпидемиологиялық ахуал күрделенген жағдайда облыстық ЖИТС және “М.Айқымбаев атындағы аса қауіпті инфекциялар Ұлттық ғылыми орталығы” Қызылорда обаға қарсы күрес станциясының ПТР зертханалары жұмысқа қосылуға дайын.

Қазіргі уақытта облыс бойынша барлық зертхананың бір күндік жалпы қуаттылығы 1820 анализді зерттеуге қауқарлы. Ағымдағы кезеңде COVID-19 анықтауға күніне 500-800-ге дейін ақылы және мемлекеттік тапсырыс бойынша сынамалар жүріп жатыр.

Жыл басынан бері облыс бойынша COVID-19 анықтауға барлығы 123 027 сынама (ақылы және мемлекеттік тапсырысқа сәйкес) жүргізілді, оның 3262 коронавирустық инфекцияға оң нәтиже анықталды.