«Sputnik Қазақстан» тілшісінің хабарлауынша, министр еліміз Қытайдан тауар әкелуге тыйым салмағанын айтты.
Қазіргі кезде тауар сатушылардың бірқатары Қытаймен арадағы шекара жабық екенін айтып, азық-түлік бағасын көтере бастады. Қазақстан Қытайдан да, Қытайға да тауар тасымалдауды тоқтатпағанын хабарлаймын. Бұл — осыны бағаны көтеруге сылтауратып отырған бизнестің теріс ниетті әрекеті ғана, — деді Бақыт Сұлтанов.
ҚР Премьер-министрінің баспасөз қызметінің хабарлауынша, Үкімет отырысында әлеуметтік маңызы бар азық-түлік бағасын тұрақтандыру шаралары қаралды. 2019 жылы Қазақстанда азық-түлік 10,4% қымбаттаған. Өңірлерде саудагерлердің бағаны белгіленген шамадан 67 рет асырғаны анықталды. Қаңтар айында Үкімет жанынан Көтерме-тарату және агрологистика орталықтары желісін дамыту жөніндегі жаңа жоба офисі құрылды, ол апта сайын мүдделі мемлекеттік органдардың, қаржы институттары мен нарық өкілдерін қатыстырып отырыс өткізеді. Премьер-министр Асқар Маминнің айтуынша, 2019 жылдың қарашасында азық-түліктің қымбаттауына жол бергені үшін өңір әкімдері орынбасарлары жазаланғаннан кейін жағдай біршама тұрақтанды, бір айдан кейін азық-түлік бағасының жалпы өсімі 0,1%, биылғы қаңтарда 0,3% ғана болды.
Сауда және интеграция министрлігінің мәліметінше, базарлар мен басқа да сауда орындарында азық-түліктің шамадан тыс қымбаттағанын байқаған жағдайда 8 (7172) 75 16 32, 8 (7172) 74 98 32 нөмірлеріне хабарлау қажет.
Айта кетейік, Қазақстан 27 қаңтардан бастап Алматы — Нұр Жолы — Үрімші, Өскемен — Майқапшағай — Үрімші, Жаркент — Қорғас — Құлжа, Аягөз — Бақты — Зимунай бағыттары бойынша жолаушылар автобусы қатынасын (барлығы 14 рейс) тоқтатты. 2020 жылдың 1 ақпанында Қазақстан мен Қытай арасында жолаушылар пойызы тоқтатылды, ал 3 ақпаннан бастап екі ел арасындағы әуе тасымалы да жабылды.
Соңғы мәлімет бойынша Қытайда коронавирус жұқтырғандардың саны 20 400-ден асты, аурудан 425 адам қайтыс болды. Қазақстан індет ошағы — Уханьнан 83 адамды эвакуациялады, олардың арасында Қазақстанмен бірге Беларусь, Армения және Қырғызстан азаматтары да бар. Қазір олар Нұр-Сұлтанда карантинге жатқызылды, дәрігерлер олардың жағдайы тәуір екенін айтты.