Алматыда мемлекет басшысының бастамасымен баспанаға ие болған жас ғалымдар жаңа пәтерлеріне қоныстанды. Бұл туралы Baribar.kz хабарлап отыр.
Пәтерлер Ғылым қызметкерлері күніне орай өтеусіз негізде берілді. Қоныс иелері толық жиһаздалған пәтерлердің жайлы өмір сүруге мүмкіндік беріп, ғылыми және кәсіби қызметке шоғырлануға жағдай жасайтынын атап өтті. Қоныстану барысында олар көрсетілген қолдау үшін шынайы алғыстарын білдірді.
Баспана алғандардың қатарында еліміздің жетекші ғылыми ұйымдарының өкілдері бар. Солардың бірі – 13 жылдық ғылыми тәжірибесі бар Шырын Мұратқызы. Ол Scopus және Web of Science базаларында индекстелетін басылымдарды қоса алғанда тоғыз ғылыми мақаланың авторы, оқу құралының тең авторы және авторлық құқық иесі.
Сонымен қатар қоныс иелерінің қатарында 15 жылдық ғылыми тәжірибесі бар Арман Өмірзақов бар. Ол халықаралық рецензияланатын журналдарда жарияланған 20-дан астам ғылыми еңбектің авторы, сонымен бірге ҚР сегіз патентінің тең авторы. Оның зерттеулері энергетика саласындағы болашағы зор бағыттарды, соның ішінде отын элементтері, микробатареялар және фотокаталитикалық материалдарды қамтиды.
Мәдина Құмарғазина Scopus халықаралық базасында жарияланған ғылыми еңбектердің авторы, сонымен бірге ҚР 10-нан астам патентінің және бір Еуразиялық патенттің тең авторы. Оның зерттеулері энергия тиімді технологияларды дамытуға және жаңартылатын энергия көздерін пайдалануға бағытталған.
