«ҚазАвтоЖол» ұлттық компаниясы ел аумағындағы республикалық маңызы бар автожолдардың қазіргі ахуалы туралы мәлімет таратты.
Компания дерегінше, қолайсыз ауа райына байланысты бірнеше өңірде көлік қозғалысына уақытша шектеу енгізілген.
«Алматы – Талдықорған – Өскемен – Шемонаиха – РФ шекарасы» автожолының 1013–1062-шақырым аралығында, яғни Абай облысының шекарасынан «Рубеж» бекетіне дейінгі учаскеде барлық көлік түрінің қозғалысы тоқтатылды.
Келесі жол учаскелерінде барлық көлік түріне шектеу қойылды:
-
«ҚХР шекарасы – Майқапшағай – Зайсанды айналып өту жолымен – Қалбатау – Семей – Павлодар – РФ шекарасы» автожолының 910–1002-шақырым аралығы (Қалбатау – Көкпекті);
-
«Алматы – Талдықорған – Өскемен – Шемонаиха – РФ шекарасы» автожолының 971–1013-шақырым аралығы (Қалбатау – Шығыс Қазақстан облысының шекарасы).
«Үшарал – Достық» автожолының 84–164-шақырым аралығында, Көктұма станциясынан Достық станциясына дейінгі бөлікте көлік қозғалысы шектелді.
«Астана – Атбасар – Жақсы – Рузаевка – Сарыкөл – Қостанай» автожолының 418–539-шақырым аралығында (Қостанай қаласы – Қарабалық кенті) жолаушылар рейстік автобустары мен дизельді қозғалтқышы бар автокөліктердің қозғалысына уақытша тыйым салынды.
Сондай-ақ тіркемесі бар және жартылай тіркемелі жүк көліктерінің қозғалысы Осинов асуында уақытша шектелді. Бұл шектеу «Өскемен – Алтай – Катонқарағай – Рахман қайнары» автожолының 46–66-шақырымындағы (Северное ауылы – Серебрянск қаласы) учаскеде қыс мезгілі аяқталғанға дейін сақталады.
«Астана – Шідерті – Павлодар – Успенка – РФ шекарасы» автожолындағы көпір құрылымының шеткі арқалықтары зақымдануына байланысты «Қалқаман» жолайрығы жабылды. Қалқаман кентіне кіреберіс және Астана бағытына шығатын жол уақытша қолжетімсіз.
