«Қазгидромет» РМК синоптиктері 17 қыркүйекке арналған ауа райы болжамын жариялады.
Синоптиктердің мәліметінше, Қазақстанның басым бөлігі оңтүстік циклонның ықпалында болып, жаңбыр жауып, найзағай ойнайды.
Тек елдің батысы мен оңтүстік-батысында жауын-шашынсыз ауа райы болады. Республика бойынша жел күшейіп, оңтүстікте шаңды дауыл, солтүстік-батыста және орталықта түнгі және таңертеңгі уақытта тұман болады, — делінген хабарламада.
Түнде Солтүстік Қазақстан облысының батысында 1 градусқа дейін үсік жүруі мүмкін.
Жетісу облысының солтүстігі мен шығысында, Алматы облысының оңтүстігі мен шығысында, Батыс Қазақстан облысының солтүстігі мен шығысында, Ақтөбе облысының батысы, орталығы мен солтүстік-шығысында, Маңғыстау облысының оңтүстігінде жоғары өрт қаупі күтіледі.
Алматы, Түркістан, Қызылорда, Атырау, Жамбыл облыстарында, Жетісу облысында, Ұлытау облысының оңтүстігінде, Маңғыстау облысының солтүстік-батысы мен оңтүстік-шығысында, Батыс Қазақстан облысының батысы мен оңтүстігінде, Қостанай облысының оңтүстік-батысында, Қарағанды облысының оңтүстігінде, Ақтөбе облысының батысы мен орталығында төтенше өрт қаупі болжануда.
