Дүйсенбіден бастап Италияның халық көп қоныстанған аймақтарында COVID-19 пандемиясының жаңа толқынына байланысты дүкендер, мейрамханалар мен мектептер жабылмақ. Католиктік Пасха мерекесі кезінде, 3-5 сәуірде карантин ел бойынша күшіне енеді. Жергілікті тұрғындарға үйден қажетсіз шығуға тыйым салынды.
Польшада пандемия басталғалы 2 миллионға жуық адам коронавирус жұқтырған, ал кейінгі тәулікте жаңа жұқтырғандардың саны 21 мыңнан асты. Ел астанасындағы ауруханалар тез толып кетуі ықтималдылығынан, билік ауруханаларға жүктемені жеңілдету үшін Варшавада және басқа қалаларда шектеу шараларын енгізбек. Аталған шаралар дүйсенбіден бастап күшіне енбек.
Португалияда, керісінше, індетті жұқтырғандар мен ауруханаға жатқандардың саны баяу төмендей бастаған, сондықтан кейбір шектеулер алынып тасталмақ, келесі аптадан бастап балабақшалар, бастауыш мектептері, шаштараздар мен кітап дүкендері қайта ашылады.
Дания, Норвегия және Исландия AstraZeneca вакцинасын қолдануды уақытша тоқтатты, өйткені бірнеше екпе қабылдаған адамдарда қан ұйығыштық пайда болып, бір адам қайтыс болған. Алайда, Дүниежүзілік денсаулық сақтау ұйымы аталған ақпаратты зерттей келе, AstraZeneca вакцинасы мен қан ұйығыштықтың арасындағы байланысқа ешқандай дәлел жоқ екендігін айтып, екпеден бас тартуға себеп жоқ деп мәлімдеді.
Францияда індеттің таралуының жаңа өсімі байқалған, төрт айда алғаш рет тәулік ішінде анықталған вирус тасымалдаушылардың саны 27 мыңнан асқан екен. Билік жағдайы ауыр науқастарды індет аз таралған аймақтарға тасымалдауды жоспарлап отыр.
Дүниежүзі бойынша COVID-19 инфекциясын жұқтырғандар саны 120 миллионға жуықтады. Оның 96 миллионнан астамы жазылды, 2 653 390 науқас қайтыс болды.
