Алдын ала болжам бойынша қаңтарда ауаның орташа айлық температурасы республиканың оңтүстік-батысы, оңтүстігі мен оңтүстік-шығысында нормадан 1 градусқа жоғары, ал қалған аймақтарда климаттық нормаға жақын болады. Бұл туралы «Қазгидромет» РМК баспасөз қызметі хабарлады.
Синоптиктердің мәліметінше, айлық жауын-шашын мөлшері нормаға жуық және нормадан жоғары болады, Павлодар мен Шығыс Қазақстан облыстарының солтүстігінде қар айлық нормадан аз жауады.
Бірінші онкүндіктің басында республиканың солтүстік, солтүстік-шығыс және орталық аймақтары суық антициклонның ықпалында болады. Термометр бағаны түнде 25-30, кей жерлерде 35 градус аязға дейін, күндіз 15-20, кей жерлерде 25 градус аязға дейін төмендейді.
Ал еліміздің батыс, оңтүстік-батыс және оңтүстік өңірлеріне жылы ауа массалары келеді және күн жауын-шашынды әрі жылы болады. Ауа температурасы түнде 2-7, кей жерлерде 12 градусқа дейін аяз болады, күндіз 0-5 градус жылы, кей жерлерде 5 градусқа дейін аяз болады.
Жалпы алғанда, қаңтар жылы әрі жауын-шашынды болады. Тек бірінші және үшінші онкүндіктің басында ауа температурасы төмендейді.
Синоптикалық жағдайдың өзгеруіне қарай консультативтік болжам бірталай өзгеріске ұшырауы мүмкін, — деп ескертеді «Қазгидромет» мамандары.
