Нұрсұлтан Назарбаев Ресей Федерациясы Үкіметінің төрағасы Дмитрий Медведевпен кездесті, — деп хабарлайды Ақорданың баспасөз қызметі.
Тараптар екі мемлекет арасындағы ынтымақтастықтың негізгі аспектілерін талқылады. Мемлекет басшысы Қазақстан мен Ресей арасында өзара сенімге негізделген және қарқынды дамып келе жатқан ықпалдастықтың стратегиялық сипатын атап өтті.
Жақында Президент Владимир Путинмен кездестім. Қазақстан мен Ресей арасындағы байланыстар үлгі етуге тұрарлық. Бізге осы қарым-қатынасты сақтау қажет, — деді Нұрсұлтан Назарбаев.
Қазақстан Президенті Еуразия экономикалық одағы, Ұжымдық қауіпсіздік шарты ұйымы және ТМД сияқты халықаралық ұйымдардың аясында екі елдің өзара ынтымақтастығын нығайту мәселелеріне тоқталды. Мемлекет басшысы Қазақстан мен Ресей үкіметтерінің сауда-экономикалық қарым-қатынастарды және өңіраралық байланыстарды нығайту ісінде маңызды роль атқаратынын атап өтіп, екіжақты ынтымақтастықты дамытуға қосқан үлесі үшін Дмитрий Медведевке ризашылық білдірді.
Ресей Федерациясы Үкіметінің төрағасы екі мемлекет арасындағы өзара тиімді қарым-қатынастардың нәтижесінде Қазақстан мен Ресей арасындағы сауда көлемі артқанын айтты.
Қазақстан — Ресейдің стратегиялық серіктесі әрі одақтасы. Біздің қарым-қатынасымыз ауқымдылығымен және тереңдігімен ерекшеленеді. Жоғары деңгейде өткізілетін көптеген кездесу және үкіметтеріміз бен бизнес қоғамдастықтарымыз арасындағы жақсы қарым-қатынастар — соның дәлелі. Біз жыл бойы түрлі басқосуда жиі жүздесеміз. Бұл — қуантарлық жәйт. Мұндай қатынастарсыз толыққанды өзара ықпалдастық орнату мүмкін емес, — деді Дмитрий Медведев.
Еске салайық, бұған дейін 1 қарашада Ресей Үкіметінің төрағасы Дмитрий Медведевтің Қазақстанға ресми сапармен келетіні хабарланған еді.