Әлеуметтік нысанның ашылу салтанатында облыс әкімі Алтай Көлгінов сөз сөйлеп, жиналғандарды құттықтады. Одан әрі ҚР Парламенті Сенатының депутаты Дархан Қалетаев, «Samruk-Kazyna Trust» әлеуметтік жобаларды дамыту қорының бас директоры Ерлан Дәрімов және «Дара» қайырымдылық қорының құрылтайшысы Гүлнар Досаевалар жылы лебіздерін білдіріп, ізгі істер жарасымды жалғасын табарына сенімін білдірді.
– Биыл «Samruk-KazynaTrust» қорының көмегімен біздің өңірге балалардың спорт және ойын алаңдарын салуға 500 млн теңге бөлінді. Ал ерекше мұқтаждықтары бар бүлдіршіндер үшін ашылып отырған бүгінгі алаңның маңызы тіпті ерекше. Біздің стратегиялық мақсатымыз – мұндай орталықтардың барлығы ерекше білімді қажет ететін балалар мен олардың отбасына қолжетімді болуы, — деп атап өтті А.Көлгінов.
Облыстық білім басқармасы ғимаратты жөндеп, құрал-жабдық сатып әперіп, аумағын абаттандыру үшін қаржы бөлді. Аталған орталық Жайық өңіріндегі мүмкіндігі шектеулі 150-ден астам балаға арнаулы қызмет көрсетеді. Орталықта тәжірибелі, білікті дефектолог, логопед, тифлопедагог мамандар қызмет ететін болады. Бір айта кетерлігі мұнда көрсетілетін көмек балаларға да, олардың отбасыларына да тегін.
«Дара» қайырымдылық қоры өкілдерінің айтуынша, бұған дейін елімізде осындай 6 орталық ашылған. Облыс орталығында 2 мың 340 бала мамандардың кәсіби көмегін қажет етеді. Аумағы 600 шаршы метр болатын жаңа орталықта дефектолог, психолог, логопед, сурдопедагог секілді мамандар еңбек етеді. Жылына даму мүмкіндіктері шектеулі 200-дей балаға және олардың отбасыларына тегін қызмет көрсетілетін болады