Не болды?
Алматыдағы Әл-Фараби даңғылында үш адамның өмірін қиған жол апаты бойынша сот процесі жалғасып жатыр. Прокурор Александр Пакты кінәлі деп танып, 10 жылға бас бостандығынан айыруды сұрады. Бұл туралы Baribar.kz хабарлап отыр.
Мәлімет
Прокурордың айтуынша, айыпталушы жазасын қауіпсіздігі ең төмен мекемеде өтеуге тиіс. Александр Пакқа мас күйде көлік айдап, адам өліміне себеп болғаны үшін айып тағылған.
Сот отырысында қаза тапқан Томирис Қыдырбектің әкесі Рүстембек Шәтенов өтемақы ретінде айыпталушыдан 100 миллион теңге сұрады.
Жалғыз қызымнан айырылдым. Оның өлімінен кейін өмірім түбегейлі өзгерді. Ешқандай ақша қызымды қайтара алмайды. Алайда моральды шығынды ескере отырып, 100 миллион теңге өтемақы төленуін әділ деп санаймын, – дейді марқұмның әкесі.
Сотта айыпталушы Александр Пак та сөз сөйлеп, өзіне қатысты әділ шешім шығаруды сұрады.
Мен кінәмді басқа біреуге артқым келмейді. Қайғылы оқиғадан кейін күн сайын менің кесірімнен қаза болған адамдарды ойлап келемін. Бұл мен үшін ауыр жүк. Менің кінәмнан көп адамның тағдырына зиян келді. Жәбірленушілер баласынан айырылды. Менің отбасым да зардап шекті. Тергеу мен сот процесінен ешқашан жалтарған емеспін. Соттан мені ақтауды сұрамаймын. Тек заңға сәйкес шешім шығаруын өтінемін. Бұған дейін ешқашан қылмыстық жауапкершілікке тартылған емеспін және мұндай жағдайға тап боламын деп ойламадым. Қаза болғандардың ата-анасынан тағы да кешірім өтінемін, – дейді айыпталушы.
Сот барысында Александр Пак кінәсін толық мойындады. Сонымен қатар бостандыққа шыққаннан кейін де қаза болғандардың отбасына қолдау көрсетуге дайын екенін айтты.
Жол апаты 21 наурызға қараған түні Әл-Фараби даңғылында болды. Салдарынан 1996 жылы туған Еламан Қайыржанұлы, 2003 жылы туған Құмар Теңелбаева және 2005 жылы туған Томирис Қыдырбек көз жұмды.
Контекст
Естеріңізге салайық, Алматы соты Әл-Фараби даңғылында болған жол апатында қаза тапқан қыздың әкесін жәбірленуші ретінде таныды.
