Түркістан облысында өз әжесінің үйіне ұрлыққа түскен күдікті анықталды. Бұл туралы Baribar.kz хабарлап отыр.
Полиция мәліметінше, оқиға Сауран ауданында болған. Полиция қызметкерлері пәтер ұрлығына қатысы бар күдіктіні жедел-іздестіру іс-шаралары барысында қолға түсірген.
Тәртіп сақшыларының мәліметінше, күдікті жігіт жәбірленушінің немересі болып шыққан. Ол үйде ешкім жоқ сәтті пайдаланып, сейфті бұзып, ішінен шамамен 3 миллион теңге көлеміндегі ақша мен алтын бұйымдарды жымқырған. Келтірілген жалпы шығын көлемі 7 миллион теңгеге жуық.
Күдікті ұрланған зергерлік бұйымдарды алтын сататын дүкендердің біріне өткізіп жібергені анықталды.
Қазіргі таңда аталған дерек бойынша қылмыстық іс қозғалып, материалдар сотқа жолданды.
