«ҚазАвтоЖол» ұлттық компаниясы елдегі жолдардың қазіргі ахуалы туралы ақпарат жариялады. Бұл туралы Baribar.kz хабарлап отыр.
Қолайсыз ауа райына байланысты республикалық маңызы бар бірқатар автожолда қозғалыс уақытша шектелді.
Ұлытау облысында
«Жезқазған — Арқалық — Петропавл» автожолының 24–137-шақырымында (Сәтбаев қаласы — Ұлытау ауылы) және «Қызылорда — Жезқазған — Қарағанды — Шідерті» автожолының 433–750-шақырымында (Жезқазған қаласы — Жаңаарқа кенті) көлік қозғалысы тоқтатылды.
Абай облысында
«Алматы — Талдықорған — Өскемен — Шемонаиха — РФ шекарасы» автожолының 778–967-шақырымы (Аягөз қаласы — Қалбатау ауылы) жабылды.
«Қонаев — Күрті» (0–67-шақырым), «Астана — Қарағанды — Алматы» (2295–2436-шақырым, Қаншеңгел — Ақсай) және «Алматы — Талдықорған — Өскемен — Шемонаиха — РФ шекарасы» автожолының 112–124-шақырымы (Шеңгелді — Жетісу облысының шекарасы) бойынша қозғалыс шектелді.
Жетісу облысында
Аталған автожолдың 124–234-шақырымы (Алматы облысының шекарасы — Жамбыл ауылы), сонымен қатар «Сарыөзек — Көктал» (3–68-шақырым) және «Үшарал — Достық» (84–164-шақырым) бағыттарында қозғалыс тоқтатылды.
Жамбыл облысында
«Қордай асуының жаңа айналма жолы» учаскесінде (159–238-шақырым, Кенен ауылы — Қайнар ауылы) көлік қозғалысы шектеліп, қозғалыс ескі Қордай асуы арқылы жүзеге асырылып жатыр.
Ақтөбе облысында
«РФ шекарасы — Мәртөк — Ақтөбе — Қарабұтақ — Қызылорда — Шымкент — Тараз — Қордай — Алматы — Қорғас — ҚХР шекарасы» автожолының 0–77-шақырымында (Жайсан БӨП — «ECO Oil» жанармай бекеті) қозғалыс тоқтатылды.
Батыс Қазақстан облысында
«Ақтөбе — Орал — РФ шекарасы» автожолының 393–526-шақырымында (Жымпиты кенті — Ақтөбе облысының шекарасы) көлік қатынасы шектелді.
Павлодар облысында
«Астана — Шідерті — Павлодар — Успенка — РФ шекарасы» автожолындағы Қалқаман жол айрығында көпір өткелінің арқалықтары зақымдануына байланысты қозғалыс шектелді.
Шығыс Қазақстан облысында
Осинов асуында тіркемесі бар және жартылай тіркемелі жүк көліктерінің қозғалысы уақытша тоқтатылды. Шектеу «Өскемен — Алтай — Катонқарағай — Рахман қайнары» автожолының 46–66-шақырымында қыс аяқталғанша сақталады.
«ҚазАвтоЖол» жүргізушілерді алыс жолға шығар алдында жол жағдайын нақтылап, қауіпсіздік талаптарын сақтауға шақырады.
