Елімізге қыркүйек соңына дейін Голландиядан екі амур жолбарысы, ал келер жылы Ресейден тағы осындай төрт жолбарыс әкелінеді. Бұл туралы экология және табиғи ресурстар министрі Нұрлан Нысанбаев мәлімдеп отыр.
Популяцияны жандандыру бағдарламасы аясында қыркүйек айының соңына дейін Голландиядан екі жолбарыс әкелеміз. Олар — амур жолбарысы. Жолбарыстың осы түрі ғана қатты аязға төзімді. Басқа жолбарыстар тек жылы аймақтарда тіршілік етеді. Келер жылы Ресейден тағы төрт жолбарыс әкелеміз, — деді Нұрлан Нысанбаев мәжілістің пленар отырысында.
Министрдің айтуынша, Қазақстан жерінде тіршілік еткен тұран жолбарысы Балқаш маңындағы қамыс өсетін алқапта, Іле өзенінің сағасындағы қамысты тоғайларды мекендеген. Бұл жануарларды соңғы рет адамдар 1948 жылы көрген. Сондықтан популяцияны қалпына келтіру үшін елге осындай ортада өмір сүре алатын амур жолбарыстары әкелінеді.
