Қырғызстан президенті Астанаға Орталық Азия мемлекеттері басшыларының VI консультативтік кездесуіне және «Орталық Азия + Жапония» диалогы мемлекеттер басшыларының бірінші саммитіне қатысу үшін келді, онда интеграциялық үдерістерді одан әрі дамыту мәселелері талқыланады.
Садыр Жапаровты премьер-министр Олжас Бектенов әуежайда қарсы алды.
Өткен жылдың қорытындысы бойынша Қазақстан мен Қырғызстан арасындағы тауар айналымы 26%-тен астам өсті. Осы жылдың бес айында өзара сауда көлемі $614,3 млн болды, бұл ретте қазақстандық тауарлар экспорты 6,7%-ке артты.
Қазіргі уақытта биылғы сәуір айында екі мемлекет басшылары қол қойған Қазақстан мен Қырғызстан арасындағы одақтастық қатынасты тереңдету және кеңейту туралы шарт ережелерін іске асыру бойынша үкіметтер деңгейінде бірлескен жұмыс жүргізіліп жатыр.
Атап айтқанда, сауда-экономикалық, көлік-логистикалық ынтымақтастықты арттыру, су-энергетика, ауыл шаруашылығы салаларындағы өзара іс-қимылды тереңдету жұмыстары атқарылып жатыр.
