Астанада демалыс күндері ауылшаруашылық жәрмеңкесі өтеді

Астанада 14 және 15 қазанда өтетін жәрменкеге Шығыс Қазақстан және Солтүстік Қазақстан облыстарының кәсіпкерлері ауыл шаруашылық тауарларын әкелді. Бұл туралы қала әкімдігі хабарлады.

Жәрменке екі күн бойы сағат 9:00-ден 18:00-ге дейін Тәуелсіздік даңғылы, 50 мекенжайында орналасқан Өнер университеті ғимаратының алаңында өтеді.

Шығыс Қазақстан облысының атынан тоғыз аудан, Солтүстік Қазақстан облысынан 13 аудан мен Петропавл қаласы қатысады.

ШҚО шаруалары мен қайта өңдеу кәсіпорындары Астана тұрғындарына жоғары және табиғи сапалы таза өнімдерін ұсынады. Өнім ассортименті 40-тан астам атауды құрайды. Оның ішінде: 49,2 тонна бал, екі тонна шұжық өнімдері, сегіз тонна сүт өнімдері, 16 тонна өсімдік майы, үш тонна ұн мен жарма, тоғыз тонна балық, 29,8 тонна ауыл шаруашылығы жануарлары мен құстарының еті, төрт тонна қымыз және ұлттық бұйымдар, 700 литр алкогольсіз сусындар және тағы басқа,- делінген хабарламада.

ШҚО тауар өндірушілері Астанаға 244,5 млн теңге сомасына 123,2 тонна өнім тасымалдайды.

Сонымен қатар СҚО аграршылары елорда қонақтары мен тұрғындарына мынадай өнімдер ұсынады: 100 тонна ет, 495 тонна картоп пен көкөніс, 33 тонна сүт өнімдері, 120 мың дана жұмыртқа, 5 тонна балық, 10,5 тонна бал, 7 тонна шұжық өнімдері, 75 тонна ұн мен макарон өнімдері, 12 тонна басқа да өнімдер.

Өнімнің жалпы көлемі 733 тоннадан асады. Жәрмеңкедегі бағалар әдеттегіден арзан болады.