«ҚР мемлекеттік күзет қызметі туралы ережені бекіту туралы» ҚР президентінің жарлығы көпшілік талқыға шығарылды.
Қазақстан Республикасы президентінің және басқа да күзетілетін адамдардың қауіпсіздігін қамтамасыз ету және олардың өміріне, денсаулығына, құқығына, бостандығына, жеке басының қадір-қасиетіне және меншігіне қарсы бағытталған құқық бұзушылықты анықтау, алдын алу және жолын кесу, — делінген «Ашық НҚА» порталында жарияланған жарлық жобасында.
Жарлық жобасы бойынша, енді мемлекеттік күзет қызметіне мына өкілеттер беріледі:
- Мемлекеттік күзет қызметінің бастығы белгілеген тәртіпте күзетілетін объектілердің күзеті мен қорғанысын жүзеге асырады, жауынгерлік кезекшілікті атқаруды ұйымдастырады;
- күзет іс-шараларын өткізу орындарында күзетілетін адамдар мен объектілердің биологиялық қауіпсіздігін қамтамасыз ету жөніндегі жұмысты ведомствоаралық үйлестіруді және ұйымдастыруды жүзеге асырады;
- қорғаныс өнеркәсібі және мемлекеттік қорғаныстық тапсырыс саласындағы мемлекеттік саясатты құрастыруға және іске асыруға қатысады;
- әскери-техникалық ынтымақтастықты жүзеге асыруға қатысады;
- жедел басқаруында тұрған қару-жарақ пен әскери техниканың айналымына бақылауды жүзеге асырады;
- ҚР жергілікті атқарушы органдарымен өзара әрекеттесе отырып жұмылдыру жоспарларын орындауға дайындық жөніндегі іс-шараларды өткізеді;
- әскери-экономикалық және командалық-штабтық оқу-жаттығуларын өткізуге қатысады;
- күзетілетін объектілердің терроризмге қарсы қорғалғандығы паспортын келіседі, есебін жүргізеді, сақтайды немесе жояды;
- айрықша мақсаттағы автомобильдердің жүру қауіпсіздігін қамтамасыз ету мақсатында Астана және Алматыда автомобиль жолдары немесе автомобиль жолдарының жекелеген учаскелері бойынша олардың жүру жылдамдығы мен маршруттарын айқындауға және осы жолдарда көлік құралдарының жүруіне, аялдауына және тоқтап тұруына шектеу енгізу, жол жүрісінің бағытын уақытша өзгертуге құқылы;
- ҚР мемлекеттік күзет қызметінің, қарулы күштерінің, басқа да әскерлері мен әскери құралымдарының, құқық қорғау және арнаулы мемлекеттік органдарының, сонымен қатар халықаралық шарттарға сәйкес, шетелдің арнаулы қызметтерінің қызметкерлері мен әскери қызметшілерін қауіпсіздікті қамтамасыз ету саласында оқытуды, даярлауды және қайта даярлауды жүзеге асыру.
Құжат 14 маусымға дейін көпшілік талқылауда болады. Кейін қол қою үшін президентке жолданады.
