Бұл туралы ведомствоның баспасөз қызметі хабарлады.
Берік Мұхамеджанұлы Ахметов Қазақстан Республикасы Ұлытау облысы бойынша мемлекеттік қызмет істері агенттігінің департаменті басшысы, әдеп жөніндегі кеңестің төрағасы қызметіне тағайындалды, — делінген хабарламада.
Берік Ахметов 1961 жылы Қарағанды облысында дүниеге келген. Қарағанды мемлекеттік университетін «құқықтану» және Қазтұтынуодағы Қарағанды экономикалық университетін «есеп және аудит» мамандықтары бойынша бітірген.
Мемлекеттік қызметтегі жалпы еңбек өтілі 36 жылдан асады.
Мемлекеттік қызметте еңбек жолын Жезқазған облыстық әлеуметтік қамтамасыз ету инспекторы болып бастаған. Жезқазған және Қарағанды облыстарының прокуратура органдарында бірқатар лауазымдарда қызмет атқарған. 2012 жылдан бастап мемлекеттік қызмет саласындағы уәкілетті органның аумақтық департаментінде жұмыс істейді.
Департамент басшысы лауазымына тағайындалғанға дейін Берік Ахметов Қазақстан Республикасы мемлекеттік қызмет істері агенттігінің Қарағанды облысы бойынша департаменті басшысының орынбасары, әдеп жөніндегі кеңес хатшылығының меңгерушісі болды.