Жергілікті «Қостанай жаңалықтары» басылымының хабарлауынша, сағат 17:23-те Қостанайдың шетінде Тобыл өзенінің бойындағы қамыстан өрт шыққан.
Қатты желдің салдарынан от Набережный көшесіндегі тұрғын үйлер мен ауладағы құрылыстарға тарады.
Төтенше жағдайлар департаментінің мәліметіне сүйенсек, өрттен 11 үй, 6 шаруашылық қора-жай және 4 көлік (оның біреуі жүк көлігі) толығымен жанып кетті. 2 үй бүлінген, зардап шеккен құрылыстардың жалпы аумағы – 1 000 шаршы метр.
Қатты жел мен түтін, сонымен қатар үйлер мен қора-жайлардың жақын орналасуы өртті сөндіруге кедергі келтірген. Қызыл жалын сағат 21:24-те толығымен сөндірілді.
Зардап шеккендер мен қаза болғандар жоқ. 25 адам эвакуацияланған. Қостанай әкімдігі тұрғындарды «Дружба» профилакториясына орналастырды. Алдағы уақытта оларға көмек көрсетіледі. Өрттің себебі мен шығыны анықталып жатыр.
