Бұл туралы Ақорданың баспасөз қызметі хабарлады.
Премьер-министрдің айтуынша, елдегі санитария-эпидемиология жағдайы тұрақтанған. Қазақстан COVID-19 инфекциясының таралу қарқыны бойынша «қызыл» аймақтан «сары» аймаққа өтті. Вирустың жұғу индексі – 0,94. Жұқпалы аурулар бөлімшелері – 33%, жан сақтау бөлімшелері – 25% толған. Вакциналау қарқыны артып келеді. Қазіргі таңда Қазақстанда 3 миллион адамға екпе салынып, оның 2 миллионы вакцинаның бірінші компонентін алған. 1 миллионға жуық адамға екпенің екінші компоненті салынды.
Асқар Мамин Қасым-Жомарт Тоқаевқа 2021 жылғы Жұмыспен қамту жол картасы бағдарламасының орындалу жоспары туралы ақпарат берді. Үкімет басшысы Жұмыспен қамту жол картасын іске асыруға биыл 300 миллиард теңге бөлінгенін, 35,6 мың жұмыс орны, оның ішінде, 20 мыңнан астам тұрақты жұмыс орны ашылатынын атап өтті.
Премьер-министр мемлекет басшысына мемлекеттік қызметшілерге еңбекақы төлеу жүйесінің пилоттық режимінің жүзеге асырылуы жөнінде баяндады. Аталған пилоттық жобаға 2018 жылы Мемлекеттік қызмет істері агенттігі, Сыбайлас жемқорлыққа қарсы іс-қимыл агенттігі, Әділет министрлігі, бірқатар өңірдің әкімдіктері қатысты. Жүргізілген тәжірибенің нәтижесінде жобаға қатысушы мемлекеттік органдарда кадрлардың алмасуы 4,9%-тен 3,5%-ке дейін азайып, мемлекеттік қызметтің тартымдылығы арта түсті (конкурс 1 орынға 3,4 есеге артты), орталықта және аймақтарда еңбекақы төлеу алшақтығы 70%-тен 16%-ке дейін қысқарды.
Мемлекет басшысы аталған жобаны жергілікті атқарушы органдарда сондай-ақ, орталық мемлекеттік органдарда ауқымды түрде жүзеге асыруды тапсырды. Сонымен бірге мемлекеттік қызметкерлердің санын кезең-кезеңімен қысқарту және мемлекеттік аппараттың ұйымдық құрылымын оңтайландыру жұмыстарын жалғастыру керек. Президент құрылымды қайта өзгерту нәтижесінде үнемделген қаржыны еңбекақы көлемін арттыруға бағыттау маңызды деп санайды.
Бұдан бөлек кездесуде сыртқы және ішкі инвестицияларды тартуды ұлғайту, шағын және орта бизнестің әлеуетін арттыру, қайта өңдеу секторының өсімі мен дамуы есебінен экономиканың құрылымын одан әрі әртараптандыру, еліміздің әлеуметтік-экономикалық дамуына қатысты басқа да өзекті мәселелер жөнінде қабылданған шаралар қарастырылды.