Асқар Мамин Үкіметтің сырқаттанушылық деңгейін төмендету мен вакцина алғандардың санын арттыру жөнінде жедел шаралар қабылдап жатқанын айтты.
Биылғы сәуірден бастап ай сайын 2 миллион адам вакцинацияланады. Денсаулық сақтау министрлігі вакцина салдыру жұмысы бойынша нақты жоспар әзірледі, — деді Үкімет басшысы.
Премьер-министрдің айтуынша, қыркүйекте вакцинациялауға жататын 10 миллион адамға екпе салу жұмысы аяқталады. Содан кейін ұжымдық иммунитеттің жинақтаушы әсері күтіледі.
Айта кетейік, өткен тәулікте Қазақстанда 1809 адамның коронавирус инфекциясын жұқтырғаны анықталды. Бір күнде коронавирус пен пневмониядан 26 науқас қайтыс болды.
Коронавирус бойынша Қазақстанның 7 өңірі «қызыл», екі өңірі «сары» аймақта орналасқан.