Бұл туралы Білім және ғылым министрі Асхат Аймағамбетов Үкімет отырысында айтты.
Оның айтуынша, колледждерде оқытылатын білім бағдарламалары жұмыс берушілердің қатысуымен жетілдіріледі, жаңартылады және нарықтағы сұраныс пен талаптарға сәйкес икемделеді.
9-сыныптан кейін колледжге оқуға түскен студенттер үшін оқу мерзімі бұрынғыдай 3,5 жыл емес, 2 жылға дейін қысқарады, — деді Асхат Аймағамбетов.
Ал 11-сыныптан кейін колледжге түскендер бұрынғыдай 2,5 жыл емес, 1,5 жыл оқиды.
Ведомство басшысы колледждердегі білім беру гранты кезең-кезеңмен көбейетінін, сонымен бірге биыл бірнеше колледжде инфрақұрылым мәселесі шешілетінін айтты.
Биыл «Жас маман» жобасы аясында 180 колледждің инфрақұрылымын жаңғырту жұмыстары аяқталады. Жобаның қорытындысы бойынша әрбір өңірде материал-техника базасы, жаңа оқу жоспарлары мен бағдарламалары бар кемінде 7 заманауи колледж жұмыс істейтін болады, — деді министр.
Айта кетейік, Асхат Аймағамбетов Үкімет отырысында биыл елімізде апатты және үш аусымды мектептердің мәселесін шешу үшін 200 мектеп салынатынын айтқан еді.