Baribar.kz журналистері өрт болған орынға 00.24-те келді. Бұл уақытта киностудия маңына біраз адам жиналған.
Аумағы 400 шаршы метр ошақ 23.10-да, екінші 200 шаршы метр ошақ 23.26-да сөндірілген. 53 қызметкер мен 16 техника жұмылдырылды. Зардап шеккендер жоқ.
Алматы әкімі Бақытжан Сағынтаев Twitter-дегі парақшасында Төтенше жағдайлар департаменті мен полицияға өрттің себебі мен шығынын анықтауды тапсырғанын жазды.
«Қазақфильмде» өрт шықты. Аумағы 400 ш. м ошақ 23:10-да, екінші 200 ш. м ошақ 23:26-да сөндірілді. 53 қызметкер мен 16 бірлік техника жұмылдырылды. Өрт салдары жойылуда. Зардап шеккендер жоқ. ТЖД мен полицияға өрттің себебі мен шығынын анықтауды тапсырдым.
— Бакытжан Сагинтаев (@sagintayev_b) August 14, 2020
00.29-да Бостандық ауданы төтенше жағдайлар бөлімінің аға инженері Виктор Выхристов өрт оқиғасына қатысты пікір білдірді. Оның айтуынша, қазіргі уақытта өрттің неден шыққаны туралы нақты ақпарат жоқ.
Өрт жұмыс уақытынан кейін болған, ғимаратта ешқандай қызметкер болмаған, — деді Виктор Выхристов.
Кейінірек төтенше жағдайлар департаментінің зертханасы өрттің неден шыққанын анықтайды.
Шәкен Аймановтың келіні Ирина Айманова киностудияның өртеніп жатқанын естіп бірден осында жеткен.
Киностудияның өртеніп жатқанын естіген соң көлікке отырып, бірден осында жеттік. Өйткені не болып жатқанын өз көзімізбен көру керек болды. Киностудия біз үшін қымбат. Өйткені оның негізін Шәкен Кенжетайұлы қалады. Біз киностудия музейі өртенген жоқ па, соны уайымдадық. Өйткені онда Шәкен Аймановқа тиесілі көп зат бар. Құдайға шүкір, ол жақ өртенбеген екен, — деді ол.
01.19-да «Қазақфильм» киностудиясы аумағы тынышталды. Адамдар тарады. Мұнда тек төтенше жағдайлар департаменті мамандары мен полиция қызметкерлері жүр.
Шәкен Айманов атындағы «Қазақфильм» студиясы Instagram-парақшасына өрт туралы жазды.
Киностудия әкімшілігі ТЖД және полиция қызметкерлері мен Алматы әкімдігіне жедел әрекет еткендері үшін шын жүректен алғысын білдіреді. Өртті сөндіруге көмектескен «Қазақфильм» қызметкерлері мен Nomad тобының каскадерлеріне де ерекше алғыс. ТЖД мәліметінше, өрттің таралу қаупі жоқ. Сіздерді алдағы оқиғалар туралы хабардар етеміз, — делінген хабарламада.
