Аталмыш компаниялардың 75 пайызы жалақыны тек басшылық құрам мен мамандарға ғана, яғни айлықтары онсыз да жоғары қызметкерлерге арттырған. Ал қарапайым жұмысшылар ортаңқол жалақыға қанағат етіп келеді. Десе де компания жетекшілері айлықты теңдей көтермегенімен, қызметкерлеріне спорт абонементтері, ұялы телефондар мен тегін тамақтану сияқты түрлі әлеуметтік пакеттер ұсынып отыр.
HeadHunter жұмыс іздеушілер порталының дерегіне сүйенсек, ең жоғарғы айлық аграрлық кешен директорларына ұсынылған. Жұмыс берушілер оған ай сайын 5 миллион теңге төлеуге бар. Сондай-ақ, сауда ойын-сауық кешендерінің сатылым алаңдарына жалға алушыларды еліктіре алатын басшылар, атқарушы директорлар мен сатылым жөніндегі менеджерлер де миллион теңгелік жалақыға үміттене алады.
Ең қажетті мамандықтар бестігіне:
- Компания қызметін ұсына білетін сауда өкілдері;
- Әкімшілік жетекшілері
- Есепшілер
- Маркетологтар,
- IT және байланыс саласының мамандары кірген.
Сонымен қатар сайтта ұсынылған бір бос орынға шикізат өндірісімен айналысатын 42 адам таласуда. Мемлекеттік қызмет пен топ-менеджмент мамандарының да шамадан артықтығы байқалып тұр. Сондай-ақ әдеттегіше жұмыс іздеген заңгерлер көп.