Қазақстан Президенті Қасым-Жомарт Тоқаев Сингапурдың аға министрі — Ұлттық қауіпсіздік мәселелері жөніндегі үйлестіруші министр Тео Чи Хинді қабылдады.
Ақорданың баспасөз қызметінің хабарлауынша, кездесу барысында тараптар Қазақстан мен Сингапур арасындағы қазіргі жағдайды және саяси, сауда-экономика салалары бойынша перспектива жобаларын, сонымен бірге цифрландыруға қатысты бірлескен іс-қимыл мәселелерін талқылады.
Қасым-Жомарт Тоқаевтың айтуынша, екі ел арасында достық қарым-қатынас орнады. Қазақстан Президенті 2019 жылдың қазан айында Ереванда өткен Жоғары Еуразия экономика одағының саммитінде Сингапур Премьер-министрі Ли Сянь Лунмен келіссөз жасаған. Мемлекет басшысы Сингапур Президенті Халима Якобке өзінің сәлемін жеткізуді өтінді.
Сингапур Президентін бұрыннан танимын. Екеуміз де өз елдеріміздің Парламентінде спикер қызметін атқардық. Мен оның Мемлекет басшысы болғанына өте қуаныштымын, — деді Қасым-Жомарт Тоқаев.
Тео Чи Хин Қасым-Жомарт Тоқаевқа Сингапур Президенті мен Премьер-министрінің тілегін жеткізді. Сонымен бірге екі ел арасындағы байланыстарды одан әрі нығайта беруге ниетті екенін атап айтты.