Ұлттық қауіпсіздік мамандары елімізге қару әкелетін ірі арнаны жойды

ҚР Ұлттық қауіпсіздік комитетінің мамандары Алматыда, Шымкентте және Қызылордада атыс қаруын заңсыз сатумен айналысқан қылмыстық топтар әрекетіне тосқауыл қойды.

Жасырын тергеу әрекеттерін жүргізу барысында 8 «Калашников» автоматын және 2 тапанша сату фактісі құжаттандырылды. Қару-жарақ заңда белгіленген тәртіппен тәркіленді, — деп хабарлады ҚР ҰҚК баспасөз қызметі.

Алматы мен Шымкентте қылмыстық топ мүшелерін ұстау операциясы 2019 жылғы 18-19 шілде күндері жүргізілген. Ұлттық қауіпсіздік комитетінің мәліметінше, ұсталғандардың арасында деструктив діни ағымды ұстанушылар мен «ұрылар қауымдастығы» өкілдерімен тұрақты байланыстағы адамдар бар.

Тінту іс-шаралары барысында фигуранттардың бірінің тұрғылықты мекенжайынан қолдан құрастыруға және қаруды қайта жасауға арналған станок пен құрал-сайман табылды, — деп хабарлады ҰҚК мамандары.

ҚР ҰҚК республика аумағына қару әкелетін кезекті ірі арна жойылды деп есептейді. Қазір мамандар осы қылмыстық топтың бұрын сатқан қару-жарағы мен оқ-дәрісін заңсыз айналымнан шығаруды қолға алды.