Сирияның Хасека провинциясы аумағында толассыз жауған жаңбыр салдарынан су тасқыны болып, жүздеген тұрғын зардап шекті. Бұл туралы Baribar.kz хабарлап отыр.
Anadolu Ajansı мәліметінше, табиғи апат салдарынан қала орталығындағы бес ауданда шамамен 700 тұрғын үйді су басқан. Көптеген баспана зақымданып, тұрғындардың бір бөлігі қауіпсіз аймақтарға эвакуацияланған.
Қазіргі уақытта елдің азаматтық қорғаныс қызметтері күшейтілген режимде жұмыс істеп жатыр. Мамандар су басқан үйлерді тексеріп, зардап шеккен тұрғындарға көмек көрсетіп, апат салдарын жою жұмыстарын жүргізіп жатыр.
Синоптиктердің мәліметінше, мұндай табиғи апаттардың жиілеуі жаһандық климаттың өзгеруімен байланысты. Сонымен қатар Эль-Ниньо құбылысы 2026 жылдың соңына қарай қайта қалыптасуы мүмкін екені айтылып отыр. Бұл әлемнің түрлі өңірлерінде су тасқыны, құрғақшылық және аптап ыстықтың күшеюіне әсер етуі ықтимал.
