Қолайсыз ауа райына байланысты бірнеше облыста республикалық маңызы бар жол уақытша жабылды. Бұл туралы Baribar.kz хабарлап отыр.
«ҚазАвтоЖол» мәліметінше, елдегі бірқатар автожол учаскесінде қозғалыс шектелді.
Павлодар облысы аумағында «Астана — Шідерті — Павлодар — Успенка — РФ шекарасы» автожолындағы «Қалқаман» жолайрығы учаскесінде, сонымен қатар «Павлодар — Шарбақты — РФ шекарасы» (82–112 шақырым) және «Атамекен — Ертіс — РФ шекарасы» (0–263 шақырым) жолдарында қозғалыс шектелді.
Ақмола облысы мен Қарағанды облысы аумағында «Астана — Қарағанды — Алматы» автожолының бірнеше бөлігінде қозғалыс уақытша тоқтатылды.
Сонымен қатар шектеу Жетісу облысы аумағындағы «Үшарал — Достық — ҚХР шекарасы» автожолының 84–164 шақырымында, Шығыс Қазақстан облысы аумағындағы «Алматы — Талдықорған — Өскемен — Шемонаиха — РФ шекарасы» автожолының 1194–1212 шақырымында енгізілді.
Бұдан бөлек, Қостанай облысы мен Ұлытау облысы аумағындағы «Жезқазған — Арқалық — Петропавл» автожолының бірқатар учаскелерінде де қозғалыс шектелген.
Жол қызметтері жүргізушілерге ауа райының қолайсыздығына байланысты алыс сапарға шықпауға және жолдағы шектеулерді ескеруге кеңес береді.
