«Қазгидромет» РМК синоптиктері 18 қаңтардан 23 қаңтарға дейін Қазақстанда ауа райы қандай болатынын болжады.
Атлантикалық циклон ықпалынан Қазақстанның басым бөлігінде жауын-шашынды ауа райы қалыптасады. Батыста, оңтүстікте және 20-21 қаңтарда елдің солтүстігінде жаңбыр мен қар түрінде жауын-шашын күтіледі. Қазақстан бойынша желдің күшеюі, тұман, көктайғақ болжанған.
18 қаңтарда Түркістан облысында, 20 қаңтарда Ұлытау облысында, 21 қаңтарда Ақтөбе, Қостанай, Солтүстік Қазақстан облыстарында, 21-22 қаңтарда Ақмола облысында, 22 қаңтарда Павлодар, Қарағанды, Түркістан, Жамбыл, Абай облыстарында, 22-23 қаңтарда Шығыс Қазақстан, Алматы және Жетісу облыстарында күшті жауын-шашын болжанып отыр.
22 қаңтардан бастап суық ауа массасы тарала бастайды, бұл ауа температурасының түнде едәуір төмендеуіне әкеледі:
- батыста 10-20 градус аязға дейін;
- солтүстік-батыста және солтүстікте 20-30 градус аязға дейін;
- орталықта және шығыста 25-35 градус аязға дейін;
- елдің оңтүстігінде 12-25 градус аязға дейін.
Синоптиктер Қазақстан азаматтарын мұқият болып, қатты аязға және күрделі ауа райы жағдайларына дайын болуға шақырады.
