Әсет Исекешев – Тұңғыш Президент қорының атқарушы директоры

Бір күн бұрын Әсет Исекешевтің ҚР Президент Әкімшілігінің басшысы қызметінен босатылғаны хабарланған еді.

Әсет Исекешев
Әсет Исекешев. Фото: Іnform.kz

Президент Әкімшілігінің басшысы лауазымынан босаған Әсет Исекешев жаңа қызметке тағайындалды. Оның тағайындалуы туралы жарлық Ақорданың сайтында жарияланды.

Қазақстан Республикасының Тұңғыш Президенті – Елбасының шешімімен Әсет Өрентайұлы Исекешев Қазақстан Республикасының Тұңғыш Президенті – Елбасы қорының атқарушы директоры болып тағайындалды, – делінген ҚР Президентінің баспасөз қызметі таратқан хабарламада.

Әсет Исекешев 24 наурыз күні ҚР Президенті Әкімшілігінің басшысы қызметінен босатылған еді. Қасым-Жомарт Тоқаевтың жарлығымен оның орнына Бақытжан Сағынтаев тағайындалды.

Еске салайық, бүгін, 25 наурызда ҚР Тұңғыш Президенті – Елбасы Нұрсұлтан Назарбаевтың шешімімен Елбасы кеңсесі құрылымдық бөлімшелерінің басшылары тағайындалды.